సినిమాలకు సెన్సార్ బోర్డు సర్టిఫికేట్ ఇవ్వాలి కానీ కట్స్ చెప్పకూడదు: కోన వెంకట్

సెన్సార్ బోర్డు పరిధి ఎంతవరకు ఉండాలో కోన వెంకట్ ప్రశ్నించారు. కామ్రేడ్ కళ్యాణ్ ఈవెంట్‌లో ఆయన మాట్లాడుతూ, సెన్సార్ బోర్డు పని సినిమాకు సర్టిఫికేట్ ఇవ్వడమే తప్ప, ఏ సీన్లు కట్ చేయాలో చెప్పడం కాదని అన్నారు.

సినిమాకు ఏ సర్టిఫికేట్ ఇవ్వాలో నిర్ణయించే అధికారం వారికి ఉందని, కానీ సీన్లు తొలగించమని అడగడం వారి పరిధి దాటిన పని అని ఆయన అభిప్రాయపడ్డారు.

ఈ సందర్భంగా కోన వెంకట్ సెటైరికల్‌గా మాట్లాడుతూ, సినిమా నేపథ్యానికి సంబంధించిన 'నక్సల్' అనే పదంపై బోర్డు అభ్యంతరం వ్యక్తం చేయడంతో, దానిని 'అన్నలు'గా మార్చామని చెప్పారు. అయితే, పాత్రలు ధరించిన ఆకుపచ్చ రంగు దుస్తుల విషయంలో ఇబ్బంది ఎదురైందని, పదాన్ని మార్చడం సులభమే కానీ, షూటింగ్ పూర్తయ్యాక దుస్తుల రంగు మార్చడం సాధ్యం కాదని ఆయన వివరించారు.

కామ్రేడ్ కళ్యాణ్ సినిమా రివైజింగ్ కమిటీకి వెళ్లి, చివరకు UA 16+ సర్టిఫికేట్ పొందిందని సమాచారం.

ప్రస్తుతం సినిమా వ్యాపారం మారిందని, OTT ప్లాట్‌ఫామ్‌లు సినిమాను కొనే ముందు పూర్తి సినిమాను చూస్తున్నాయని కూడా కోన వెంకట్ పేర్కొన్నారు.