బిగ్ బాస్ తెలుగు 10: తనకి తానే 9/10 రేటింగ్ ఇచ్చుకున్న రోహిత్‌పై నాగార్జున ఆగ్రహం

బిగ్ బాస్ తెలుగు 10 డే 34 శనివారం ప్రోమోలో, తన ఆటకి తానే 9/10 రేటింగ్ ఇచ్చుకున్న రోహిత్‌పై నాగార్జున తీవ్రస్థాయిలో మండిపడ్డారు.

హౌస్‌లో ఉండటానికి అర్హత లేని వారిని ఎంచుకోమని నాగార్జున ఒక టాస్క్ ఇచ్చారు. హౌస్‌మేట్స్ అందరూ రోహిత్ పేరునే చెప్పారు. ప్రవర్తన, పనులు, టాస్కులు ఇలా అన్నింటిలోనూ రోహిత్ విఫలమయ్యాడని వంశీ చెప్పగా, రోహిత్ ఆటలో హింస, అహంకారం, దూకుడు ఎక్కువగా ఉన్నాయని దేబ్జాని పేర్కొన్నారు. హౌస్‌లో ఉండటానికి కావాల్సిన మానవత్వం రోహిత్‌లో లేదని వర్షిణి విమర్శించింది.

దీనిపై రోహిత్ స్పందిస్తూ, తనని వ్యక్తిగతంగా దూషించినప్పుడు ఎవరూ మాట్లాడలేదని, ఇప్పుడు తనని పనికిరాడని అనడం ఆశ్చర్యంగా ఉందని అన్నాడు.

అప్పుడు నాగార్జున తనకి తానే రేటింగ్ ఇచ్చుకోమని అడగగా, ఆటకి 9, పనులకి 7, టాస్కులకి 9 అని రోహిత్ చెప్పడంతో హౌస్‌మేట్స్ నవ్వుకున్నారు. ఎన్ని టాస్కులు గెలిచావని అడిగితే, ఒక్కటి కూడా గెలవలేదని రోహిత్ ఒప్పుకున్నాడు. రాత్రంతా మాట్లాడటమే ఆట కాదని, షాలినితో రోహిత్ చేసే అర్థరాత్రి ముచ్చట్లని ఉద్దేశించి నాగార్జున సెటైర్ వేశారు. సుధీర్ చెప్పినట్లుగా 'మేలుకో రాజా మేలుకో' అంటూ నాగార్జున ముగించారు.

అంతేకాకుండా, తమకి కేటాయించిన బాత్‌రూమ్ క్లీనింగ్ పనులు చేయలేదని రోహిత్, షాలినిలను నాగార్జున మందలించారు.

మరో వీకెండ్ ప్రోమోలో, కంటెస్టెంట్ల ఫోటోలు ఉన్న కుండలను నాగార్జున బేస్‌బాల్ బ్యాట్‌తో పగలగొట్టారు. ప్రతిదానికి ఎందుకు అరుస్తావని అపూర్వని అడిగి, ఆమెకి 'అరుపూర్వ' అని పేరు పెట్టారు. బూతులు మాట్లాడినందుకు అమన్‌ని, పనులు చేయించలేకపోయినందుకు కెప్టెన్ వర్షిణిని నాగార్జున తప్పుబట్టారు.

అన్నింటికంటే ఎక్కువగా ఝాన్సీకి చుక్కలు చూపించారు. ముఖేష్‌తో జరిగిన గేమ్‌లో ఝాన్సీ కొట్టిన క్లిప్‌ని చూపించి, పల్లెటూరి వారు అమాయకులని అనుకున్నానని, కానీ ఇలా మోసం చేస్తారని అనుకోలేదని నాగార్జున అనడంతో ఝాన్సీ కన్నీరు పెట్టుకుంది.