కామ్రేడ్ కళ్యాణ్: ఆచార్య దళం సీన్ గురించి చిరంజీవి ముందే చెప్పారన్న శ్రీవిష్ణు

కామ్రేడ్ కళ్యాణ్ సినిమాకు ఫ్యామిలీ ఆడియన్స్ బాగా వస్తున్నారని శ్రీవిష్ణు అన్నారు. సినిమాలోని ఆచార్య దళం ఎపిసోడ్ చాలా బాగుంటుందని మెగాస్టార్ చిరంజీవి ముందుగానే అభినందించారని ఆయన తెలిపారు.

సినిమా సక్సెస్ మీట్‌లో మాట్లాడుతూ, మౌత్ టాక్ బాగుందని, పిల్లలతో కలిసి కుటుంబమంతా చూడదగ్గ చిత్రమని ఆయన పేర్కొన్నారు. ప్రేక్షకులకు రెండున్నర గంటల పాటు నవ్వులను పంచడమే లక్ష్యంగా ఈ సినిమా తీశామని, ఈ జోరు ఇలాగే కొనసాగుతుందని ఆశిస్తున్నానని చెప్పారు.

నిన్న రాత్రి నుంచే ఇండస్ట్రీ నుంచి చాలా మంది ఫోన్ చేసి అభినందిస్తున్నారని, ఒక ప్రముఖ హీరో కూడా సినిమా బాగుందని మెచ్చుకున్నారని శ్రీవిష్ణు చెప్పారు. సినిమా మొదలైనప్పటి నుంచి మద్దతుగా నిలిచిన ఆర్ నారాయణ మూర్తికి ఆయన కృతజ్ఞతలు తెలిపారు.

ఆచార్య దళం సీన్ ఇప్పుడు సినిమాకే హైలైట్‌గా మారింది. కోన వెంకట్ ఈ ఐడియా చెప్పినప్పుడు ఇది వర్కవుట్ అవుతుందనిపించింది, కానీ చిరంజీవి గారికి చూపించాలని అనుకున్నాను. ఆయన ఇది కచ్చితంగా హైలైట్ అవుతుందని చెప్పారు, ఇప్పుడు అదే నిజమైందని శ్రీవిష్ణు అన్నారు.

సినిమాలో నుంచి ఒక పూర్తి జాతర ఎపిసోడ్‌ను తొలగించామని కోన వెంకట్ వెల్లడించారు. అందులో ఒక మంత్రిని కిడ్నాప్ చేయడం, అతన్ని చంపడానికి కామ్రేడ్స్ రావడం, మరో గ్రూప్ అతన్ని కాపాడటానికి జాతరలోకి రావడం వంటి సీన్లు ఉంటాయి. దాని స్థానంలో వెన్నెల కిషోర్ ఎపిసోడ్ పెట్టామని, ఆ నిర్ణయం సినిమాకు ప్లస్ అయ్యిందని కోన వెంకట్ చెప్పారు. ఆ జాతర ఎపిసోడ్‌ను రెండో వారంలో సోషల్ మీడియాలో విడుదల చేస్తామని, ప్రేక్షకులు దాన్ని చూసి నిర్ణయించుకోవచ్చని ఆయన తెలిపారు.

బాక్సాఫీస్ వద్ద కామెడీ వర్కవుట్ అవ్వడంతో ప్రేక్షకులు థియేటర్లకు క్యూ కడుతున్నారు. ఈ సినిమా బ్రేక్ ఈవెన్ లక్ష్యానికి చేరువలో ఉందని సమాచారం.