మైత్రీ మూవీ మేకర్స్ కొత్త చిత్రం #MythriInLove ప్రారంభం, హీరో హీరోయిన్లుగా జై జస్తి, మేధా మేక

మైత్రీ మూవీ మేకర్స్ సంస్థ కొత్త రొమాంటిక్ ఎంటర్‌టైనర్ #MythriInLove ను పూజా కార్యక్రమాలతో ఘనంగా ప్రారంభించింది. ఈ చిత్రంతో జై జస్తి, మేధా మేక హీరో హీరోయిన్లుగా పరిచయం అవుతున్నారు.

మేధా ప్రముఖ నటులు శ్రీకాంత్, ఊహల కుమార్తె. జై జస్తి గతంలో 'F3' చిత్రానికి అసిస్టెంట్ డైరెక్టర్‌గా పనిచేశారు.

ఈ ప్రారంభోత్సవ కార్యక్రమంలో ఎమ్మెల్యే గంటా శ్రీనివాసరావు స్క్రిప్ట్‌ను అందించారు. సాహు గారపాటి, అర్చన కెమెరా స్విచ్ ఆన్ చేయగా, నందిని రెడ్డి క్లాప్ ఇచ్చారు. ముహూర్తపు షాట్‌కు సౌమ్య ఎర్నేని దర్శకత్వం వహించారు.

ఈ సందర్భంగా విడుదలైన ఫస్ట్ లుక్ పోస్టర్‌లో జైని మేధా వెనుక నుంచి హగ్ చేసుకున్నట్లుగా కనిపిస్తోంది. జై క్యాజువల్ లుక్‌లో ఆకట్టుకుంటున్నారు.

'30 వెడ్స్ 21', 'మిడిల్ బెంచ్ రవి' వెబ్ సిరీస్‌లతో గుర్తింపు పొందిన పృథ్వీ వనం ఈ చిత్రంతో దర్శకుడిగా పరిచయం అవుతున్నారు. మహేష్ బాబు పి ఈ చిత్రానికి క్రియేటర్. నవీన్ ఎర్నేని, వై రవి శంకర్ నిర్మాతలుగా వ్యవహరిస్తుండగా, ప్రముఖ గేయ రచయిత రామజోగయ్య శాస్త్రి కుమారుడు సాయి హర్ష సంగీతం అందిస్తున్నారు.

ఒక అబ్బాయి, అమ్మాయి మధ్య ఉండే సరదా, ఊహించని సంఘటనల నేపథ్యంలో ఈ రొమాంటిక్ ఫ్యామిలీ డ్రామా సాగుతుంది. త్వరలోనే ఈ సినిమా అధికారిక టైటిల్‌ను మేకర్స్ వెల్లడించనున్నారు.