క్రేజీ కళ్యాణం ట్రైలర్ వచ్చేసింది: పెళ్లి నేపథ్యంలో అనుపమ, నరేష్ మరియు తరుణ్ భాస్కర్ సందడి

క్రేజీ కళ్యాణం థియేట్రికల్ ట్రైలర్ విడుదలైంది. ఒక పెళ్లి నేపథ్యంలో సాగే ఈ సినిమా కథలో అనుకున్నవి అనుకున్నట్లు జరగకపోతే ఏం జరుగుతుందనేది ఆసక్తికరంగా చూపించారు. దసరా సందర్భంగా అక్టోబర్ 16న ఈ చిత్రాన్ని ప్రపంచవ్యాప్తంగా విడుదల చేస్తున్నట్లు మేకర్స్ ప్రకటించారు.

తన కూతురు అనుపమ పరమేశ్వరన్ కోసం సరైన వరుడిని వెతికే తండ్రి పాత్రలో వీకే నరేష్ నటించారు. అయితే అనుపమ ఆలోచనలు వేరుగా ఉంటాయి. కెరీర్ పట్ల ఆసక్తి ఉన్న ఆమె, ఇంటి పనుల్లో కూడా భర్త సాయం చేయాలని కోరుకుంటుంది. తండ్రి సంబంధం చూసినప్పుడు, తనకు ఇప్పటికే మరొకరితో ప్రేమ ఉందని చెప్పి షాక్ ఇస్తుంది.

నరేష్ అల్లుడు బాలురాజు పాత్రలో తరుణ్ భాస్కర్ కామెడీని పండించారు. పగలు మంచి వ్యక్తిలా, రాత్రి పూట తాగుబోతులా ఆయన చేసే అల్లరి నవ్వులు పూయిస్తుంది.

రాజు వెడ్స్ రాంభాయ్ ఫేమ్ అఖిల్ రాజ్ ఉద్దేమరి, అనుపమను ప్రేమలో పడేయాలని ప్రయత్నించే పాత్రలో కనిపిస్తారు. ఈ సినిమాలో అనుపమ తెలంగాణ యాసలో మాట్లాడటం విశేషం.

బద్రప్ప గజ్జుల దర్శకత్వంలో తెరకెక్కిన ఈ చిత్రానికి సురేష్ బొబ్బిలి సంగీతం అందించారు. బూసం జగన్ మోహన్ రెడ్డి ఈ చిత్రాన్ని ఆరో సినిమాస్ బ్యానర్‌పై ప్రొడక్షన్ No. 2గా నిర్మించారు.